Po shihja online, të hedhur në YouTube, një emision prej serisë së programit kulturor ARTES, të Televizionit Shqiptar, drejtuar prej Elsa Demos. I ftuar ishte drejtori i Teatrit Kombëtar Altin Basha. Elsa Demo dhe Altin Basha janë, secili në fushën e vet, përfaqësuesit më të denjë të asaj që gazetaria kulturore dhe spektakli shqiptar i dy tre dekadave të fundit mund të ofrojnë.
Personalisht nuk e ndjek sistematikisht gazetarinë kulturore shqiptare dhe aq më pak spektaktlin shqiptar që prej 2018. Por, teksa shihja këtë emision në YouTube, më bëri përshtypje sesa pa risi gazetaria kulturore dhe spektakli shqiptarë ende janë, sesa pak kam humbur gjatë përhumbjeve të mija psiko-fizike duke mos i ndjekur dhe sesa pak kanë lëvizur ujrat e kënetës shqiptare.
Por, kush e ka fajin për këtë? Përgjigjia që jam munduar të racionalizojë fillimisht për veten dhe më pas për të tjerët është, prej kohësh tashmë, ky blog: ku AKS është akronim i ndjekjes së trajektores së artit, A, në transformimin e tij në kulturë, K, dhe më pas shpërfytyrimit të tij në spektakël, S; ndryshe thënë, në konsumim topitës dhe bukosës i trupit dhe i ndjenjave. Dhe për këtë, kontribut të pamohueshëm, kanë Elsa dhe Altini.
Për të kuptuar këtë më duhet të ndalem tek emisioni i sipërpërmendur i serisë ARTES, i cili në nëntitullin e videos së hedhur online ka “Teatri i Altin Bashës në një vit”.
Praktikisht emisioni fokusohet në punën e Altinit si drejtues i një institucionit kombëtar kulturor. Por Elsa, që ka si horizont të formimit të saj intelektual Shqipërinë e tranzicionit, ku të pranosh dhe të mësosh nga idiotizmat që mund të kesh bërë dje quhet dobësi dhe jo forcë për t’u ngritur intelektualisht dhe përmirësuar profesionalisht, nuk bën as dallimin më të vogël mbi pyetjet që mund t’i bënte një drejtori, konkurrent apo të emëruar, të një teatri kombëtar 5, 10 apo 15 vite më parë, nga pyetjet që duhet t’i bëjë një drejtori në 2024. Dhe të dish të bësh pyetje, për një gazetare, në një botë normale, është themel ontologjik dhe deontologjik i profesionit.
Pra, këtu, Elsa tregon esencën e mikrobotës ku jeton, Shqipërisë, vendin ku tranzicioni i patranzitueshëm, jo kalimtar, njësoj si foljet e gramatikës, të cilat nuk kanë nevojë për një kundrinor, të cilat shprehin një veprim që nuk bie mbi një objekt apo frymor, është status quo. Dhe në status quo, gjë që Elsa dhe Altini kanë dhe janë, objekti është i nënkuptueshëm, supozuar si i ditur prej dy personave që komunikojnë. Por, a ja kanë idenë se për çfarë flasin Elsa dhe Altini? Statusi i tyre, prej të cilit i njohim dhe prej të cilit marrin rrogat, thotë se po. Por a ja bëjnë me dije publikut?
Në thelb, pra, më interesojnë disa pyetje mbi të njëjtin objekt: si ka mundësi të bëhet bilanci i “Teatrit të Altin Bashës në një vit” kur publiku nuk di mbi ç’baza bëhet ky bilanc? Thjeshtë: ku dhe si verifikohet? Elsa dhe Altini e dinë apo nuk e dinë? Nëse po, përse nuk ja bëjnë të njohur publikut që të ketë një ide mbi kriteret dhe indikatorët/matësit e kritereve?
Në një emision të një serie tjetër, ARKAPIA, të po kësaj gazetareje, por në një televizion privat, nëntitulluar “Premtimet e Hervin Çulit në sytë e Bashës, Çipit, Fugës”, ku i ftuar ishte edhe Altin Basha, një përpjekje për të nxjerrë në pah objektin, të famshin e nënkuptuar prej të gjithë pjestarëve të status quo-së, bëhet, thuajse që në hyrje të emisionit prej vetë Elsa Demos, e cila thotë se “kam kërkuar prej Ministrisë së Kulturës të më vënë në dispozicion platformën fituese (të drejtorit të Teatri Kombëtar, Hervin Çulit)” por pa arritur të ketë sukses në këtë inisiativë ORIGJINALE të saj. Madje Kastriot Çipi, po aty, thoshte që “në këtë rast unë ja vej fajin jo vetëm Ministrisë së Kulturës, por edhe vetë kandidatit, që në këtë rast është Hervin Çuli, i cili duhet ta kishte bërë publike platformën, edhe nëse nuk e bënte Ministria”. Bile, Çipi këtë vendim etik ndaj publikut taksapagues e kishte ndërmarrë personalisht që kur ishte zgjedhur drejtor nëpërmjet konkursit të parë në Shqipëri, në 2010, kur platformën e tij e kishte “POTHUAJSE” bërë “100% publike në revistën KLAN”.
Por, tani jemi në 2024 dhe, fatkeqësisht, objekti i asaj për ç’ka flitet përfshirë kriteret dhe matëstit e vet, as pothuajse e asfare i bëhen me dije publikut … as në një emision të televizionit publik shqiptar. Dhe prej këtej publiku i shastisur dhe topitur në kolltukun e tij detyrohet të dëgjojë Elsën prej status quo-së së saj dhe Altinin prej status quo-së së tij, që midis tyre kanë edhe përplasje, të cilat nënkuptohen prej ritmit dhe tonit të bashkëbisedimit, por që s’e nxjerrin publikun askund, përveçse në (më të mirin e rasteve) në një lodhje pasive apo mpiksje të mëtejshme psiko-fizike në kulltuk.
Imagjinoj që teletrumpiksurit, publik i thjeshtë apo ekspertë dhe profesionistë aktivë të fushës së teatrit, mund edhe të debatojnë midis tyre nëpër kafene apo tjetërkund pasi të kenë dëgjuar këtë emision, duke folur përçdunisht edhe ata mbi të njëjtin objekt të munguar të emisionit e duke i dhënë herë të drejtë Elsës e herë të drejtë Altinit. Por askush, falë teletrumpkisjes së ngulitur tashmë në kulturë, nuk do të dijë të shpjegojë se çfarë ideje ka Altini mbi teatrin. P.sh. a e di Altini që të kesh një ide mbi teatrin nuk është e njëjta gjë që të dish të prodhosh ide nëpërmjet teatrit? Kam përshtypjen se kjo pyetje do i dukej tepër abstrakte jo vetëm Altinit, por edhe publikut që e lexon. Por, pavarësisht nga sa mund të duket, nuk është kaq abstrakte, sepse nëse dikush ka një ide mbi teatrin ky dikush nuk mund ta shesë e prostituojë atë ide, sepse ideja krijon bindje dhe bindja e përvetësuar, që ndikon të ndërgjegjshmen e të pandërgjegjshmen, ka të bëjë me koherencën e idesë së teatrit si koncept, hapësirë, vend, dhe mjet. Nëse ke një ide mbi teatrin nuk mund të bësh një teatër ideshë. Thjeshtë sepse ideja, e përvetësur si bindje, do kërcasë me idetë e tjera që të bëhen lesh e lì në kokë dhe ajo ç’ka do nxjerrësh si produkt nuk do jetë produkt i një ideje artistike por rendje e parreshtur ndaj ideve që nuk i ke si bindje të tuat, të përvetësuara personalisht. Në pak fjalë, do jetë ajo ç’ka Altin Basha bën: teletrumpiksje portokallizuese e vetes dhe spektatorit.
A e bën me qëllim Altini këtë? Nuk besoj, sepse, njësoj si Elsa, është pjesë teletrumpiksëse e status quo-së, por edhe i teletrumpiksur i status quo-së. Pra, e bën sepse mendon, duke qenë se i konfirmohet nga ata që e paguajnë, se është status quo dhe eksitohet nga egoja e ngrefur dhe i pëlqen masturbimi intelektual nëpërmjet prodhimi t të iderave në teatër; por në të njëjtë kohë edhe nuk e bën me qëllim deri në fund, sepse nuk e kupton sesa teletrumpiksur është, sesa kontradikta dhe jo-koherencë ka tek puna e tij bazuar jo në një ide mbi medium-in por te të punuarit në media (teatër, TV, etj.) për të prodhuar idera të përcipta mbi gjërat. Pra, pavarësisht kalimit nga “Teatri i Kiços”, te “Teatri i Çulit” e “Teatri i Altinit”, asgjëja e idesë vazhdon e prodhon idenë e asgjërave. Edhe një herë, pra, kemi triumfin e mungesës së objektit: për çfarë dreqin flasin këta?
Në një emsion tjetër të ARKAPIA-s, Altini mundohet, pas cytjes së Elsës, të na flasë për nevojën e të qenurit “sfidues” karshi pushtetit politik. Këtë e thoshtë në një kohë kur nuk kishte postin e drejtorit. Nëntitulli i emisionit “Rama e Kumbaro e kanë thyer çdo gjë që kanë prekur” e demonstronte këtë sfidë. Por, me një koherencë jo të zakontë, Altini drejtor në ARTES, kërkonte edhe të ishte “i sfiduar prej të rinjve”. Dikush mund të thotë “ja pra ku e ke dhe koherencën”. “A nuk është kjo koherencë fryt i një ideje të qartë mbi teatrin?” Por koherenca nuk i duket kërkuar Altinit të para 6 vjetve, tek ARKAPIA, por Altinit drejtor tek ARTES, i cili nga status quo-ja e tij i lejon vetes të pedagogjizojë rininë për të qënë edhe më sfiduese. Pra, pyetja është pse ky drejtor nuk është sfidues i pushtetit por zgërlaqet kur Ministria i ul edhe buxhetin e mjerë të TK? Praktikisht, pse nuk sfidon kur pushteti politik i heq edhe brekët? Dhe ka fytyrë të flasë për teatër komercial apo jo komercial, të flasë për një teatër kombëtar që nuk është dhe nuk duhet të komercial, pavarësisht se ai vetë është regjizor i Portokallisë. Por siç duket psikoza e teletrumpkisjes nuk sheh as tek hunda e vet e jo më përtej saj!
P.S. Dikush mund të thotë që nuk ka asgjë të keqe që një drejtor i një institucioni publik kombëtar punon edhe privatisht kur ka kohë të lirë. Madje, unë kam hyrë në konflik me një dipllomore private si Universiteti Polis sepse, pasi prostituoi idenë time në Teatër Kombëtar, donte të më ndalonte në kohën time të lirë të zhvilloja të njëjtën ide. Dhe dikush mund të pyesë, pse, a nuk qenka e njëjta gjë? Të njëjtën liri doje ti, të njëjtën liri do edhe drejtori. Të gjithë duhet të kenë liri dypunësimi dhe fitimi, nëse u jepet mundësia. Po, patjetër, do u përgjigjesha, nëse prodhoni idera pa ja patur idenë … teatrit si medium artstik, teatrit si hapësirë artistike, teatrit si vend (edhe monument kulture që duhet mbrojtur), teatrit si marrëdhënie punëdhënës-punëmarrës (menaxhim). Po, patjetër, e njëjta gjë është të kesh pozitën e një drejtori të një teatri kombëtar dhe pozitën e një punëmarrësi të shantazhueshëm që duhet t’i thotë “po” pronarit dhe pushtetarit. Fundja, ata, pronari dhe pushtetari, e kanë një ide fikse: paranë! Ne vetëm sa e zbatojmë dhe zbukurojmë atë me idera të tjera që i shtohen dhe nënshtrohen idesë fillestare!